૧૫મા નાણાંપંચની ગ્રાન્ટમાંથી ૧૭થી વધુ વિસ્તારોની પાણીની તકલીફ દૂર કરવા પાલિકાનો મહત્વનો નિર્ણય
પાટણ,
પાટણ નગરપાલિકા દ્વારા શહેરીજનોને પ્રાથમિક સુવિધાઓ પુરી પાડવાની કટિબદ્ધતાના ભાગરૂપે એક મોટું કદમ ઉઠાવવામાં આવ્યું છે. શહેરના જુદા જુદા ૧૭થી વધુ વિસ્તારોમાં લાંબા સમયથી ચાલી આવતી પીવાના પાણીની સમસ્યાના કાયમી ઉકેલ માટે સોમવારના રોજ રૂ. ૧૨૪.૯૭ લાખ (આશરે ૧૨૫ લાખ)ના ખર્ચે નવીન પાઇપલાઇન તેમજ ૨ વિસ્તારોમાં નવા બોરવેલ બનાવવાના કામનું ભવ્ય ખાતમુહૂર્ત કરવામાં આવ્યું હતું.
આ વિકાસકાર્યો માટે ૧૫મા નાણાંપંચના વર્ષ ૨૦૨૦-૨૧ અને ૨૦૨૧-૨૨ની ગ્રાન્ટનો ઉપયોગ કરવામાં આવ્યો છે. સોમવારે આયોજિત ખાતમુહૂર્ત પ્રસંગે જિલ્લા અને શહેરના અગ્રણીઓ તેમજ પાલિકાના પદાધિકારીઓ ખાસ ઉપસ્થિત રહ્યા હતા. આગામી દિવસોમાં પાટણના ૧૭થી વધુ વિસ્તારોના નાગરિકોને પૂરતા પ્રમાણમાં અને શુદ્ધ પીવાનું પાણી મળી રહેશે.
આ ગરિમામય ખાતમુહૂર્ત પ્રસંગે રમેશભાઈ સિંધવ (જિલ્લા ભાજપ પ્રમુખ), સંજયભાઈ પટેલ(મહામંત્રી), હર્ષ પટેલ(શહેર પ્રમુખ), ચંદ્રિકાબેન રાવળ (પાલિકા પ્રમુખ), ઉત્કર્ષ પટેલ** (ઉપપ્રમુખ), નિલમ પટેલ(કારોબારી ચેરમેન), હિરલબેન ઠાકર (ચીફ ઓફિસર – CO) સહિતના આગેવાનો અને નગરસેવકો ઉપસ્થિત રહ્યા હતા:
આ પ્રસંગે ઉપસ્થિત મહાનુભાવોએ જણાવ્યું હતું કે, પાટણ નગરપાલિકા હંમેશાં શહેરીજનોને ઉત્તમ અને પ્રાથમિક સુવિધાઓ સમયસર ઉપલબ્ધ બને તે માટે સતત કાર્યશીલ છે.
આ ખાતમુહૂર્ત અંતર્ગત હાથ ધરાનાર નવીન પાણીની પાઇપલાઇનો અને ૨ વિસ્તારોમાં સંપ (Sump) બનાવવાની કામગીરી પૂર્ણ થતાં જ, શહેરના ૧૭થી વધુ વિસ્તારોમાં પીવાના પાણીની સમસ્યાનો કાયમી નિકાલ આવશે. સ્થાનિક રહીશોને પૂરતા ફોર્સથી અને નિયમિત પાણી મળશે તેવી આશા પદાધિકારીઓએ વ્યક્ત કરી હતી. લોકઉપયોગી એવા આ કાર્યને પગલે સ્થાનિક રહીશોમાં પણ ખુશીનો માહોલ જોવા મળ્યો હતો.
