પાટણ: શ્રી પદ્મનાભ મંદિર પરિસર ખાતે બિરાજમાન સ્વામી પરિવારના આરાધ્ય અને પરમ પૂજનીય કુળદેવી શ્રી સમેળા માતાજીના મંદિર પરિસરમાં નવરાત્રિ પર્વ અંતર્ગત આસો સુદ નોમની રાત્રિએ અત્યંત ભક્તિમય અને ઉત્સાહપૂર્ણ માહોલમાં ધાર્મિક કાર્યક્રમનું આયોજન કરવામાં આવ્યું હતું. પાવન નોરતાની પૂર્ણાહુતિના આ અવસરે માતાજીના સાનિધ્યમાં સમગ્ર સ્વામી પરિવારે એકત્ર થઈને દિવ્ય વાતાવરણનું નિર્માણ કર્યું હતું.
આસો સુદ નોમની રાત્રે શ્રદ્ધાળુઓ અને પરિવારજનો દ્વારા માતાજી સમક્ષ દીપ પ્રગટાવી સામૂહિક મહાઆરતી કરવામાં આવી હતી. માતાજીના જયઘોષ અને મંત્રોચ્ચારથી સમગ્ર પરિસર ગુંજી ઊઠ્યું હતું. ત્યારબાદ ઉપસ્થિત સૌ ભક્તોએ પરંપરાગત રાસ-ગરબાની રમઝટ બોલાવી માતાજીની આરાધના કરી હતી. સૌ કોઈએ એકતા અને શ્રદ્ધાભાવ સાથે મા સમેળાના ચરણોમાં શીશ ઝુકાવી મંગલ આશીર્વાદ પ્રાપ્ત કર્યા હતા.
આ ધાર્મિક ઉત્સવ પ્રસંગે શ્રી પદ્મનાભ વાડી ટ્રસ્ટના પ્રમુખ શ્રી યશપાલભાઈ સ્વામી ખાસ ઉપસ્થિત રહ્યા હતા. તેમની સાથે અગ્રણીઓ શ્રી શાંતિભાઈ સ્વામી, શ્રી કમલેશભાઈ સ્વામી, શ્રી ખન્નાભાઈ, શ્રી વિજયભાઈ, શ્રી મહેશભાઈ તેમજ શ્રી કનુભાઈ ઝવેરી સહિતના મહાનુભાવોએ હાજરી આપી કાર્યક્રમની શોભા વધારી હતી. આ ઉપરાંત, સ્વામી પરિવારના ભાઈઓ, બહેનો, વડીલો અને યુવાનો મોટી સંખ્યામાં એકઠા થઈને દર્શન, આરતી અને ગરબામાં ઉત્સાહભેર જોડાયા હતા. આરતી બાદ સૌ ભક્તોમાં પ્રસાદનું વિતરણ કરવામાં આવ્યું હતું અને આનંદોલ્લાસ વચ્ચે સમગ્ર કાર્યક્રમ સંપન્ન થયો હતો.
