ભરતનાટ્યમ અને નિબંધ સ્પર્ધામાં શાળાના વિદ્યાર્થીઓએ મેળવ્યો પ્રથમ નંબર
ઉત્તર ગુજરાત યુવક મંડળ સંચાલિત શાળાના વિજેતા વિદ્યાર્થીઓ અને માર્ગદર્શક શિક્ષકો પર અભિનંદનની વર્ષા
પાટણ : ગુજરાત સરકારના રમતગમત, યુવા અને સાંસ્કૃતિક પ્રવૃત્તિઓ વિભાગ, ગાંધીનગર દ્વારા રાજ્યના સાંસ્કૃતિક વારસાનું જતન થાય અને કલા-સાહિત્યને પ્રોત્સાહન મળે તે હેતુથી દર વર્ષે ‘કલા મહાકુંભ’નું આયોજન કરવામાં આવે છે. આ અંતર્ગત તાજેતરમાં પાટણની આદર્શ હાઇસ્કૂલ ખાતે તાલુકા કક્ષાના કલા મહાકુંભનું આયોજન કરવામાં આવ્યું હતું.
આ સ્પર્ધામાં ઉત્તર ગુજરાત યુવક મંડળ સંચાલિત શેઠ એમ. એન. હાઈસ્કૂલના વિદ્યાર્થીઓએ ભરતનાટ્યમ, નિબંધ, ચિત્ર સ્પર્ધા, ભજન અને વક્તૃત્વ સહિતની વિવિધ સ્પર્ધાઓમાં ભારે ઉત્સાહભેર ભાગ લીધો હતો.
વિદ્યાર્થીઓની ગૌરવવંતી સિદ્ધિ: શાળાના વિદ્યાર્થીઓએ વિવિધ સ્પર્ધાઓમાં શાનદાર પ્રદર્શન કરી વિજેતાપદ પ્રાપ્ત કર્યું હતું. જેમાં:
- ઠક્કર ધ્વનિ મુકેશભાઈ દ્વારા ‘ભરતનાટ્યમ’ સ્પર્ધામાં પ્રથમ નંબર મેળવવામાં આવ્યો છે.
- સથવારા જીયા દ્વારા ‘વિકસિત ભારત’ અંતર્ગત યોજાયેલ નિબંધ સ્પર્ધામાં પ્રથમ નંબર પ્રાપ્ત કરી શાળાનું નામ રોશન કર્યું છે.
શાળા પરિવાર દ્વારા અભિનંદન: વિદ્યાર્થીઓની આ શાનદાર સિદ્ધિ બદલ શાળાના આચાર્યશ્રી ડૉ. ધનરાજભાઈ કે. ઠક્કરે તમામ વિજેતા વિદ્યાર્થીઓ તેમજ તેમને યોગ્ય માર્ગદર્શન પૂરું પાડનાર શિક્ષકો ડૉ. ગીતાબેન પરમાર, બીનાબેન પટેલ અને વિપુલભાઈ પટેલને હાર્દિક અભિનંદન પાઠવ્યા હતા.
શેઠ એમ. એન. હાઈસ્કૂલ દિન-પ્રતિદિન પ્રગતિના નવા શિખરો સર કરી રહી છે ત્યારે શાળા મંડળના પ્રમુખશ્રી ડૉ. જે. કે. પટેલ અને મંત્રીશ્રી મનસુખભાઈ પટેલે પણ સમગ્ર ઉત્તર ગુજરાત યુવક મંડળ પરિવાર વતી તમામ વિજેતાઓ અને માર્ગદર્શક શિક્ષકોને ઉત્તરોત્તર પ્રગતિ માટે શુભેચ્છાઓ પાઠવી હતી.
