પાટણ: આગામી તારીખ ૨૬/૦૪/૨૦૨૬ ના રોજ પાટણ જિલ્લામાં તાલુકા પંચાયત, જિલ્લા પંચાયત અને નગરપાલિકાની ચૂંટણીઓ યોજાવા જઈ રહી છે. આ ચૂંટણી પ્રક્રિયા સંપૂર્ણપણે સુચારૂ, પારદર્શક અને શાંતિપૂર્ણ વાતાવરણમાં સંપન્ન થાય તે માટે પાટણ જિલ્લા પોલીસ વડા શ્રી વી.કે. નાયી ના માર્ગદર્શન હેઠળ પોલીસ વિભાગ દ્વારા લોખંડી બંદોબસ્ત તૈનાત કરવામાં આવ્યો છે.
બંદોબસ્તની મુખ્ય વિગતો:
ચૂંટણી દરમિયાન કાયદો અને વ્યવસ્થા જળવાઈ રહે તે માટે જિલ્લા પોલીસ વડાની આગેવાનીમાં વિશાળ કુમક ખડકી દેવામાં આવી છે:
- ઉચ્ચ અધિકારીઓ: ૪ ડીવાયએસપી (Dy.SP), ૨૩ પોલીસ ઈન્સ્પેક્ટર (PI), અને ૫૭ પોલીસ સબ-ઈન્સ્પેક્ટર (PSI).
- પોલીસ ફોર્સ: ૧૧૦૮ પોલીસ કર્મીઓ અને ૧૫૬૪ જીઆરડી (GRD) તથા હોમગાર્ડના જવાનો.
- સ્પેશિયલ ફોર્સ: એસઆરપીએફ (SRPF) ની ૨ પ્લાટુન અને ૧૬ ક્યુઆરટી (QRT – Quick Response Team) ની ટુકડીઓ તૈનાત રહેશે.
ટેકનોલોજી અને સુરક્ષા સાધનો:
ચૂંટણી પ્રક્રિયા પર બાજ નજર રાખવા માટે આધુનિક સંસાધનોનો ઉપયોગ કરવામાં આવશે:
- બોડી વૉર્ન કેમેરા: ફિલ્ડ પર ફરજ બજાવતા જવાનો માટે કુલ ૧૪૭ બોડી વૉર્ન કેમેરા ફાળવવામાં આવ્યા છે.
- મોબાઈલ વાહનો: ૭૭ પોલીસ મોબાઈલ વાહનો સતત જિલ્લામાં પેટ્રોલિંગ કરશે.
- વીડિયોગ્રાફી: ૧૦૦ થી વધુ વીડિયોગ્રાફરો દ્વારા મતદાન મથકો અને સંવેદનશીલ વિસ્તારોનું શૂટિંગ કરવામાં આવશે.
જિલ્લા પોલીસ વડાની અપીલ:
પાટણ જિલ્લા પોલીસ વડા શ્રી વી.કે. નાયી સાહેબે જણાવ્યું છે કે, “જિલ્લાના તમામ નાગરિકો કોઈપણ પ્રકારના ભય વગર અને પારદર્શક રીતે પોતાના મતાધિકારનો ઉપયોગ કરી શકે તે માટે પોલીસ વિભાગ કટિબદ્ધ છે.” તેમણે જિલ્લાના મતદારોને વધુમાં વધુ સંખ્યામાં મતદાન કરી લોકશાહીના આ મહાપર્વની ઉજવણી કરવા પ્રોત્સાહિત કર્યા છે.
જિલ્લામાં ક્યાંય પણ અનિચ્છનીય બનાવ ન બને તે માટે પોલીસ પ્રશાસન દ્વારા તમામ તૈયારીઓ પૂર્ણ કરી દેવામાં આવી છે અને અસામાજિક તત્વો પર કડક નજર રાખવામાં આવી રહી છે.
