સહકારી ક્ષેત્રના મહાનાયક જ્યોતિન્દ્રભાઈ મહેતાનો ૭૫માં જન્મવર્ષે અમદાવાદમાં ભવ્ય સન્માન સમારોહ

કેન્દ્રીય મંત્રી સુરેશ પ્રભુ અને જગદીશભાઈ વિશ્વકર્મા સહિતના મહાનુભાવોએ જ્યોતિન્દ્રભાઈના વિઝનને બિરદાવ્યું

પાટણથી NYCS ડાયરેક્ટર હિરેનભાઈ શાહ અને સહકાર ભારતીના અગ્રણીઓએ પાઠવી શુભેચ્છા

સહકારી ક્ષેત્રના મિશાલ સમાન જ્યોતિન્દ્રભાઈ મહેતાના ૭૫માં જન્મવર્ષ નિમિત્તે અમદાવાદમાં ભવ્ય સન્માન સમારોહ યોજાયો: કેન્દ્રીય મંત્રી સુરેશ પ્રભુ અને દિગ્ગજ નેતાઓની ઉપસ્થિતિ

અમદાવાદ: સહકારી ક્ષેત્રમાં જેનું નામ આદરપૂર્વક લેવાય છે તેવા પ્રેરણાસ્ત્રોત અને સહકાર ભારતીના પાયાના પથ્થર સમાન માનનીય શ્રી જ્યોતિન્દ્રભાઈ મહેતાના ૭૫ વર્ષ પૂર્ણ થવાના અવસરે અમદાવાદના શાહીબાગ સ્થિત સરદાર વલ્લભભાઈ પટેલ મેમોરિયલ હોલ ખાતે એક ભવ્ય સન્માન સમારોહનું આયોજન કરવામાં આવ્યું હતું. ગુજરાત અર્બન કો-ઓપરેટિવ બેંક્સ ફેડરેશન, નેશનલ ફેડરેશન ઓફ અર્બન કો-ઓપરેટિવ બેંક્સ એન્ડ ક્રેડિટ સોસાયટી અને નેશનલ અર્બન કો-ઓપરેટિવ ફાઇનાન્સ એન્ડ ડેવલપમેન્ટ કોર્પોરેશનના સંયુક્ત ઉપક્રમે યોજાયેલા આ કાર્યક્રમમાં સહકારી જગતના માંધાતાઓ ઉમટી પડ્યા હતા.
શ્રી જ્યોતિન્દ્રભાઈ મહેતા, જેઓ NYCS ના સ્થાપક સદસ્ય છે, તેમણે સહકાર ભારતીમાં એક સામાન્ય કાર્યકર્તા તરીકે સફર શરૂ કરી ગુજરાત પ્રદેશ અધ્યક્ષ અને ત્યારબાદ રાષ્ટ્રીય અધ્યક્ષ પદ સુધી પહોંચીને દેશભરમાં સહકારી પ્રવૃત્તિને નવી ઊંચાઈઓ પર પહોંચાડી છે. તેમના આ અનન્ય પ્રદાનની નોંધ લેતા કેન્દ્રીય ઉદ્યોગ મંત્રી શ્રી સુરેશ પ્રભુએ જણાવ્યું હતું કે, જ્યોતિન્દ્રભાઈએ સહકારના માધ્યમથી સમાજના અંતિમ વ્યક્તિ સુધી આર્થિક સમૃદ્ધિ પહોંચાડવાનું ભગીરથ કાર્ય કર્યું છે. કાર્યક્રમમાં મુખ્ય વક્તા તરીકે ઉપસ્થિત રાષ્ટ્રીય સ્વયંસેવક સંઘના ગુજરાત પ્રાંત સંઘચાલક ડો. ભરતભાઈ પટેલે જ્યોતિન્દ્રભાઈના જીવન અને કાર્યશૈલીને આજના કાર્યકર્તાઓ માટે પથદર્શક ગણાવી હતી.
આ પ્રસંગે ગુજરાત ભાજપ પ્રદેશ પ્રમુખ શ્રી જગદીશભાઈ વિશ્વકર્મા, રિઝર્વ બેંકના ડાયરેક્ટર શ્રી સતીષ મરાઠે, શ્રી દિલીપભાઈ સંઘાણી, શ્રી અજયભાઈ પટેલ તથા શ્રી સુરેન્દ્રભાઈ પટેલ જેવા મહાનુભાવોએ પણ ઉપસ્થિત રહી જ્યોતિન્દ્રભાઈનું વિશેષ સન્માન કર્યું હતું. આ કાર્યક્રમમાં પાટણ જિલ્લાનું પણ વિશેષ પ્રતિનિધિત્વ જોવા મળ્યું હતું, જેમાં NYCS ના ડાયરેક્ટર અને સહકાર ભારતીના અગ્રણી શ્રી હિરેનભાઈ શાહ તથા શ્રી હરિભાઈ પટેલ સહિતના કાર્યકર્તાઓ મોટી સંખ્યામાં ઉમટી પડ્યા હતા અને તેમના લાંબા આયુષ્યની કામના કરી હતી. સમગ્ર કાર્યક્રમ સહકારી ભાવના અને સેવાના સાક્ષાત્કાર સમાન બની રહ્યો હતો.