રાધનપુર: રાધનપુર ડિવિઝનની પોલીસે શુક્રવારે મોટી કાર્યવાહી હાથ ધરતાં ₹70.61 લાખ કિંમતના ભારતીય બનાવટના ગેરકાયદે વિદેશી દારૂનો નાશ કર્યો છે. પોલીસ અધિક્ષક પાટણના આદેશ પર રાધનપુર, વારાહી અને સાંતસાંલપુર પોલીસ સ્ટેશનોમાં વિવિધ સમયે પકડાયેલા 19 ગુનાઓનો મુદ્દામાલ નષ્ટ કરવામાં આવ્યો છે.
કોર્ટની પરવાનગી બાદ રાધનપુરથી મહેસાણા જતા હાઇવે પર શબ્દલપુરા ગામ નજીક સરકારી ખાલી જમીન પર આ કામગીરી હાથ ધરવામાં આવી હતી.
અધિકારીઓની હાજરીમાં થયો નાશ
સબ ડિવિઝનલ મેજિસ્ટ્રેટ રાજેશકુમાર મૌર્ય (IAS), નાયબ પોલીસ અધિક્ષક (રાધનપુર) પરેશ રેણુકા, નશાબંધી અને આબકારી અધિક્ષક તથા સ્થાનિક થાણાના ઇન્ચાર્જની હાજરીમાં કુલ 20,907 દારૂની બોટલનો નાશ કરવામાં આવ્યો.
પોલીસ સ્ટેશન પ્રમાણે વિગત
રાધનપુર પોલીસ સ્ટેશને 13 ગુનાઓમાં, વારાહી પોલીસ સ્ટેશને 3 ગુનાઓમાં અને સાંતસાંલપુર પોલીસ સ્ટેશને 3 ગુનાઓમાં જપ્ત કરેલા મુદ્દામાલનો સમાવેશ થાય છે. નશાબંધી કાયદાના અમલીકરણમાં રાધનપુર ડિવિઝન પોલીસની આ મહત્વની કાર્યવાહી ગણવામાં આવે છે.
