પાટણ, તા. 24
રાજ્યવ્યાપી ટાઈપ-1 ડાયાબિટીસ (જુવેનાઈલ ડાયાબિટીસ) નિયંત્રણ તથા જાગૃતિ કાર્યક્રમનો રાજ્યના માનનીય મુખ્યમંત્રીશ્રી ભૂપેન્દ્ર પટેલના કરકમળે આજ રોજ શુભારંભ કરવામાં આવ્યો હતો. આ રાજ્યસ્તરીય કાર્યક્રમના અનુસંધાને પાટણ જિલ્લામાં પણ કાર્યક્રમનો પ્રારંભ પાટણના ધારપૂર વિસ્તારમાં આવેલી GMERS મેડિકલ કોલેજ અને હોસ્પિટલના પીડિયાટ્રિક વિભાગ ખાતે કરવામાં આવ્યો હતો.
આ પ્રસંગે જિલ્લા આર.સી.એચ.ઓ.શ્રી, હોસ્પિટલના તબીબી અધિક્ષકશ્રી, આર.એમ.ઓ.શ્રી, પીડિયાટ્રિક વિભાગના વડા (HOD) તેમજ પીડિયાટ્રિક વિભાગનો તબીબી અને પેરામેડિકલ સ્ટાફ ઉપસ્થિત રહ્યો હતો. ઉપરાંત, જિલ્લામાં કાર્યરત આર.બી.એસ.કે. (રાષ્ટ્રીય બાળ સ્વાસ્થ્ય કાર્યક્રમ)ની ટીમ પણ કાર્યક્રમમાં હાજર રહી હતી.
કાર્યક્રમ દરમિયાન ટાઈપ-1 ડાયાબિટીસથી પીડિત બાળકો તથા તેમના વાલીઓને આમંત્રિત કરવામાં આવ્યા હતા. તબીબો દ્વારા ડાયાબિટીસ વિષયક વિસ્તૃત માહિતી આપવામાં આવી હતી, જેમાં રોગના લક્ષણો, સમયસર નિદાનની મહત્વતા, નિયમિત ઇન્સુલિન સારવાર, યોગ્ય આહાર વ્યવસ્થા, જીવનશૈલીમાં જરૂરી ફેરફારો તથા લાંબા ગાળાની સંભાળ અંગે માર્ગદર્શન આપવામાં આવ્યું હતું.
અધિકારીશ્રીઓએ પોતાના સંબોધનમાં જણાવ્યું હતું કે ટાઈપ-1 ડાયાબિટીસ ધરાવતા બાળકો યોગ્ય સારવાર, નિયમિત ચકાસણી અને સતત દેખરેખ દ્વારા સ્વસ્થ અને સામાન્ય જીવન જીવી શકે છે. સરકાર આવા બાળકોના આરોગ્ય અને કલ્યાણ માટે સંપૂર્ણ રીતે પ્રતિબદ્ધ હોવાનું પણ તેમણે જણાવ્યું હતું. આર.બી.એસ.કે. ટીમ દ્વારા આવા બાળકોની સ્ક્રીનિંગ, સમયસર ઓળખ, યોગ્ય રિફરલ, સારવારનું અનુસંધાન તથા સતત ફોલો-અપની જવાબદારી નિભાવવામાં આવશે તેમ જણાવાયું હતું.
કાર્યક્રમના અંતે ટાઈપ-1 ડાયાબિટીસ ધરાવતા બાળકોને ડાયાબિટીસ કીટનું વિતરણ કરવામાં આવ્યું હતું, જેમાં જરૂરી આરોગ્ય સામગ્રીનો સમાવેશ કરવામાં આવ્યો હતો. આ કાર્યક્રમથી બાળકો અને તેમના પરિવારજનોમાં રોગ અંગે જાગૃતિ, સમજણ અને આત્મવિશ્વાસમાં નોંધપાત્ર વધારો થયો હોવાનું જણાયું હતું.
આ સમગ્ર કાર્યક્રમ પાટણ જિલ્લામાં બાળ આરોગ્ય સેવાઓને વધુ મજબૂત બનાવવા તરફ એક મહત્વપૂર્ણ પગલું સાબિત થયો છે.
