પાટણ જિલ્લામાં ગેરકાયદેસર રીતે વસવાટ કરતા બાંગ્લાદેશી નાગરિકોને ઝડપી પાડવા માટે પોલીસ પ્રશાસન દ્વારા એક સઘન ઓપરેશન હાથ ધરવામાં આવ્યું છે.
ગુજરાત રાજ્યમાં ગેરકાયદેસર રીતે વસવાટ કરતા વિદેશી નાગરિકોને શોધી કાઢવા માટે શરૂ કરાયેલા ખાસ અભિયાન અંતર્ગત પાટણ જિલ્લા પોલીસને મોટી સફળતા મળી છે. બોર્ડર રેન્જ આઈજી અને પાટણ એસપીના સીધા માર્ગદર્શન હેઠળ જિલ્લામાં ‘ઓપરેશન ડેલ્ટા હન્ટ’ (Operation Delta Hunt) ધમધમાવવામાં આવી રહ્યું છે.
આ ઓપરેશન અંગે વિગતો આપતા પાટણના DySP પરેશ રેણુકાએ જણાવ્યું હતું કે, જિલ્લામાં ગેરકાયદેસર બાંગ્લાદેશીઓની ઓળખ કરવા માટે પોલીસ તંત્ર એક્શન મોડમાં આવ્યું છે.
25 ટીમો અને 68 લોકેશન પર દરોડા
DySP પરેશ રેણુકાના જણાવ્યા અનુસાર, આ મોટા પાયે ચાલી રહેલી તપાસ માટે પાટણ એલસીબી (LCB), એસઓજી (SOG), પેરોલ ફર્લો સ્ક્વોડ અને જિલ્લાના અલગ-અલગ પોલીસ સ્ટેશનોની મળીને કુલ 25 જેટલી ટીમો કાર્યરત કરવામાં આવી હતી. આ ટીમો દ્વારા જિલ્લાના 68 જેટલા શંકાસ્પદ લોકેશન્સ પર દરોડા પાડી તપાસ હાથ ધરવામાં આવી હતી.
દસ્તાવેજોની ચકાસણી અને પૂછપરછ
તપાસ દરમિયાન શંકાસ્પદ જણાતા લોકોના અલગ-અલગ દસ્તાવેજો અને ડોક્યુમેન્ટ્સની ઝીણવટભરી ચકાસણી કરવામાં આવી હતી. પ્રાથમિક તપાસમાં કુલ 15 જેટલા શંકાસ્પદ વ્યક્તિઓ મળી આવ્યા હતા. આ તમામ શંકાસ્પદ લોકોની સઘન પૂછપરછ (Detailed Interrogation) હાથ ધરવામાં આવી હતી.
કુલ 8 બાંગ્લાદેશી નાગરિકોની ઓળખ થઈ
પોલીસની ઊંડાણપૂર્વકની પૂછપરછમાં અત્યાર સુધીમાં કુલ 8 બાંગ્લાદેશી નાગરિકો ગેરકાયદેસર રીતે વસવાટ કરતા હોવાનું આઈડેન્ટીફાય થયું છે. જેમાં શરૂઆતમાં 6 બાંગ્લાદેશીઓ અને ત્યારબાદ મોડી રાત્રે વધુ 2 બાંગ્લાદેશી નાગરિકોની ઓળખ કરવામાં પોલીસને સફળતા મળી છે.
કેટલા સમયથી અને શું પ્રવૃત્તિ કરતા હતા?
DySP પરેશ રેણુકાએ આ અંગે જણાવ્યું કે, પકડાયેલા લોકોમાંથી કેટલાંક નાગરિકો ટૂંકા સમયથી તો કેટલાંક લાંબા સમયથી પાટણ જિલ્લામાં વસવાટ કરી રહ્યા છે. તેઓ અહીં કઈ ચોક્કસ પ્રવૃત્તિઓ સાથે સંકળાયેલા હતા, તેની સત્તાવાર અને ચોક્કસ વિગતો આગામી સમયમાં થનારી સઘન પૂછપરછ અને અન્ય એજન્સીઓના જોઈન્ટ ઈન્ટ્રોગેશન બાદ જ સ્પષ્ટ થશે.
આગામી સમયમાં પણ તપાસ ચાલુ રહેશે
પોલીસ પ્રશાસન દ્વારા સ્પષ્ટ કરવામાં આવ્યું છે કે, પકડાયેલા બાંગ્લાદેશી નાગરિકો સામે કાયદેસરની કાર્યવાહી કરવામાં આવી રહી છે. આ ઉપરાંત, જો હજુ પણ જિલ્લામાં કોઈ અન્ય બાંગ્લાદેશી નાગરિક ગેરકાયદેસર રીતે રહેતો હોવાનું સામે આવશે, તો તેને પણ શોધી કાઢીને કડક કાનૂની પગલાં ભરવામાં આવશે. ‘ઓપરેશન ડેલ્ટા હન્ટ’ આગામી દિવસોમાં પણ આ જ રીતે સક્રિય રહેશે.
