જી.સી.ઈ.આર.ટી. દ્વારા આયોજિત તથા જિલ્લા શિક્ષણ અને તાલીમ ભવન, પાટણ દ્વારા જિલ્લા કક્ષા નો કલાઉત્સવનું આયોજન કરવામા આવ્યું હતું. આ કલાઉત્સવમાં વિવિધ શાળાના વિદ્યાર્થીઓએ સંગીત, નૃત્ય, ચિત્રકલા સહિતની કલાત્મક પ્રવૃત્તિઓમાં ઉત્સાહપૂર્વક ભાગ લીધો હતો.
આ સ્પર્ધામાં શ્રી પાટણ જૈન મંડળ સંચાલિત શ્રી બી.ડી. સાર્વજનિક વિદ્યાલય, પાટણના વિદ્યાર્થીઓએ સંગીત અને વાદન ક્ષેત્રે ઉત્કૃષ્ટ પ્રદર્શન કરી શાળાનું તથા પાટણ જિલ્લાનું ગૌરવ વધાર્યું છે. શાળાની પ્રતિભાશાળી વિદ્યાર્થીની મોદી વિધિશા દિલીપભાઈએ સંગીત સ્પર્ધામાં પોતાની મધુર સ્વરલહરી અને ભાવસભર પ્રસ્તુતિ દ્વારા ન્યાયાધીશોને મંત્રમુગ્ધ કરી જિલ્લા કક્ષાએ પ્રથમ ક્રમ પ્રાપ્ત કર્યો હતો. તેમની આ સિદ્ધિ શાળાના સંગીત શિક્ષણની ગુણવત્તા અને વિદ્યાર્થીઓની પ્રતિભાનો ઉજાગર પુરાવો બની છે.
તેમજ વાદન સ્પર્ધામાં શાળાના વિદ્યાર્થી સોલંકી યોગેશે પોતાની સુમેળભરેલી અને તાલબદ્ધ વાદન પ્રસ્તુતિ દ્વારા દ્રિતીય ક્રમ મેળવી શાળાનું નામ ઉજ્જ્વળ બનાવ્યું હતું. સમગ્ર સ્પર્ધા દરમિયાન બી.ડી. સાર્વજનિક વિદ્યાલયના વિદ્યાર્થીઓએ આત્મવિશ્વાસ, કલાત્મક કુશળતા અને શિસ્તબદ્ધ પ્રસ્તુતિથી ઉપસ્થિત સૌનું ધ્યાન આકર્ષિત કર્યું હતું.
આ ઉત્કૃષ્ટ સિદ્ધિ પાછળ વિદ્યાર્થીઓને સતત માર્ગદર્શન અને પ્રોત્સાહન આપનાર શિક્ષકો ડૉ. ઓ.બી. દેસાઈ, કે. આઈ. દેસાઈ તથા પૂજાબેન રાજગોરનો મહત્વપૂર્ણ ફાળો રહ્યો છે. સાથે જ સંસ્થાના વ્યવસ્થાપન અને શાળાના સહયોગી વાતાવરણને કારણે વિદ્યાર્થીઓ પોતાની પ્રતિભા પુરેપુરી રીતે વિકસાવી શક્યા હોવાનું જણાયું હતું.
આ વિજયથી શ્રી બી.ડી. સાર્વજનિક વિદ્યાલયનું નામ જિલ્લા સ્તરે વધુ ઉજળું બન્યું છે. સંસ્થાના આચાર્ય ડૉ. બી. આર. દેસાઈએ વિજયી વિદ્યાર્થીઓને હાર્દિક અભિનંદન પાઠવ્યા હતા અને શાળાના તમામ શિક્ષક સ્ટાફે વિદ્યાર્થીઓના ઉજ્જ્વળ ભવિષ્ય માટે શુભેચ્છાઓ વ્યક્ત કરી હતી. આ સિદ્ધિ આવનારા સમયમાં રાજ્ય અને રાષ્ટ્રીય સ્તરે પણ શાળાના વિદ્યાર્થીઓ નવી ઊંચાઈઓ સર કરશે તેવી આશા વ્યક્ત કરવામાં આવી છે.
