104 કોલેજોના 1600થી વધુ વિદ્યાર્થીઓ વચ્ચે પાટણની આર્ટ્સ કોલેજનો વિજયી ડંકો
હેમચંદ્રાચાર્ય ઉત્તર ગુજરાત યુનિવર્સિટી દ્વારા તારીખ 05 અને 06 ઓક્ટોબર, 2026 દરમિયાન યુનિવર્સિટી કન્વેન્શન હોલ ખાતે આયોજિત 37મા યુથ ફેસ્ટિવલમાં નોર્થ ગુજરાત એજ્યુકેશન સોસાયટી સંચાલિત પાટણની શ્રી અને શ્રીમતી પી. કે. કોટાવાલા આર્ટ્સ કોલેજે સતત બીજા વર્ષે જનરલ ચેમ્પિયનશિપ પ્રાપ્ત કરીને સમગ્ર ઉત્તર ગુજરાતમાં પાટણનું ગૌરવ વધાર્યું છે.
આ યુથ ફેસ્ટિવલમાં ઉત્તર ગુજરાતની 104 કોલેજોના 1600થી વધુ વિદ્યાર્થીઓએ વિવિધ સાંસ્કૃતિક, સાહિત્યિક અને સંગીત સ્પર્ધાઓમાં ઉત્સાહભેર ભાગ લીધો હતો. આટલી વિશાળ સ્પર્ધા વચ્ચે પાટણની પી. કે. કોટાવાલા આર્ટ્સ કોલેજના પ્રતિભાશાળી વિદ્યાર્થીઓએ પોતાની સંગીતકલા, સખત મહેનત અને ઉત્કૃષ્ટ પ્રદર્શનના બળે સર્વાધિક ગુણ પ્રાપ્ત કરી સતત બીજા વર્ષે જનરલ ચેમ્પિયન બનવાનું ગૌરવ મેળવ્યું હતું.
કોલેજના વિદ્યાર્થીઓએ સંગીત વિભાગની તમામ સાત સ્પર્ધાઓમાં વિજેતા બની અનોખો રેકોર્ડ સર્જ્યો હતો. જેમાં વેસ્ટર્ન ગ્રૂપ સોંગ અને ઇન્ડિયન ગ્રૂપ સોંગમાં પ્રથમ સ્થાન, શાસ્ત્રીય સંગીતમાં ઈશાન રાઠોડે પ્રથમ સ્થાન, વેસ્ટર્ન સોલો સિંગિંગમાં ઝલક ઠાકોરે પ્રથમ સ્થાન, તાલ વાદ્યમાં ધ્રુવ નાયકે પ્રથમ સ્થાન, સ્વર વાદ્યમાં દીપકદાન ગઢવીએ પ્રથમ સ્થાન તેમજ લાઇટ સિંગિંગમાં કુ. શિખા નાયકે દ્વિતીય સ્થાન પ્રાપ્ત કર્યું હતું. આમ, સંગીતની કુલ સાત સ્પર્ધાઓમાંથી છમાં પ્રથમ અને એકમાં દ્વિતીય સ્થાન પ્રાપ્ત કરીને કોલેજના વિદ્યાર્થીઓએ પોતાની અસાધારણ પ્રતિભાનો પરિચય આપ્યો હતો.
આ તમામ વિદ્યાર્થીઓને સંગીતની સઘન તાલીમ અને માર્ગદર્શન ડૉ. સમ્યક પારેખ દ્વારા આપવામાં આવ્યું હતું. વિદ્યાર્થીઓની આ ગૌરવપૂર્ણ સફળતા પાછળ કોલેજના આચાર્ય ડૉ. રીટાબેન પારેખનું કુશળ નેતૃત્વ અને સતત પ્રોત્સાહન મહત્વપૂર્ણ રહ્યું હતું. આ ઉપરાંત ડૉ. આશુતોષભાઈ પાઠક, ડૉ. લિપિબેન આચાર્ય, ડૉ. ઝંખનાબેન જાની, ડૉ. પિયુષભાઈ ચાવડા તેમજ કોલેજની કલ્ચરલ કમિટીના તમામ સભ્યોનું વિશેષ યોગદાન રહ્યું હતું.
આ ગૌરવપૂર્ણ સિદ્ધિ અંગે NGES કેમ્પસ સંચાલક ડૉ. જય ધ્રુવે જણાવ્યું હતું કે, “શિક્ષણનો સાચો અર્થ માત્ર વર્ગખંડ પૂરતો સીમિત નથી, પરંતુ વિદ્યાર્થીઓની અંદર રહેલી પ્રતિભાને યોગ્ય મંચ, માર્ગદર્શન અને પ્રોત્સાહન આપીને તેમનો સર્વાંગી વિકાસ કરવાનો છે. સતત બીજા વર્ષે જનરલ ચેમ્પિયનશિપ પ્રાપ્ત કરવી એ માત્ર એક કોલેજની જીત નથી, પરંતુ વિદ્યાર્થીઓની અવિરત મહેનત, શિક્ષકોના સમર્પણ અને NGES પરિવારની શિક્ષણ સાથે સંસ્કૃતિ તથા કલાને પ્રોત્સાહન આપવાની પરંપરાનું પરિણામ છે. આ સિદ્ધિ ઉત્તર ગુજરાતના યુવાનો માટે પ્રેરણારૂપ છે.”
સતત બીજા વર્ષે જનરલ ચેમ્પિયનશિપ પ્રાપ્ત કરીને પી. કે. કોટાવાલા આર્ટ્સ કોલેજે સાબિત કર્યું છે કે પ્રતિભા, પરિશ્રમ અને યોગ્ય માર્ગદર્શનનો સમન્વય થાય ત્યારે સફળતા માત્ર એક ઘટના નહીં, પરંતુ એક પરંપરા બની જાય છે.
આ પ્રસંગે NGES કેમ્પસ સંચાલક ડૉ. જય ધ્રુવ, કોલેજના આચાર્ય ડૉ. રીટાબેન પારેખ તેમજ સમગ્ર કોલેજ પરિવારે તમામ વિજેતા અને ભાગ લેનાર વિદ્યાર્થીઓ, સંગીત પ્રશિક્ષક, અધ્યાપકો તથા કલ્ચરલ કમિટીને હાર્દિક અભિનંદન પાઠવી ભવિષ્યમાં પણ રાષ્ટ્રીય અને આંતરરાષ્ટ્રીય સ્તરે કોલેજ તથા પાટણનું નામ રોશન કરે તેવી શુભેચ્છાઓ વ્યક્ત કરી હતી.
