પાટણ,
પાટણ શહેરના એ-ડિવિઝન સિટી પોલીસ ઇન્સ્પેક્ટર કે.જે.ભોંયે દ્વારા આજે એક મહત્વપૂર્ણ બેઠકનું આયોજન કરવામાં આવ્યું હતું. એ-ડિવિઝન પોલીસ સ્ટેશન વિસ્તારમાં આવતા તમામ ડી.જે. સાઉન્ડ સિસ્ટમના માલિકો તેમજ ઓપરેટરોને બોલાવીને ધ્વનિ પ્રદૂષણ નિયંત્રણ અંગે કડક સૂચનાઓ આપવામાં આવી હતી.
ધ્વનિ પ્રદૂષણ રોકવા પોલીસ એક્શન મોડમાં
બેઠક દરમિયાન સિટી પી.આઈ. કે.જે.ભોંયે દ્વારા તમામ ડી.જે. સંચાલકોને ઓછા ડેસિબલમાં અને નિયત મર્યાદામાં જ સાઉન્ડ વગાડવા માટે સ્પષ્ટ તાકીદ કરવામાં આવી હતી. લગ્નપ્રસંગો કે અન્ય જાહેર કાર્યક્રમોમાં મોટા અવાજે વાગતા ડી.જે.ના કારણે લોકોને થતી અગવડતા અને ધ્વનિ પ્રદૂષણને અટકાવવા માટે આ પગલું લેવામાં આવ્યું છે.
રાત્રે ૧૦ વાગ્યા પછી ડી.જે. વગાડવા પર પ્રતિબંધ
પોલીસ પ્રશાસન દ્વારા સુપ્રીમ કોર્ટની ગાઇડલાઇનનું ચુસ્તપણે પાલન કરવાના આદેશો આપવામાં આવ્યા છે. જે અંતર્ગત:
રાત્રે ૧૦:૦૦ વાગ્યા પછી કોઈપણ સંજોગોમાં ડી.જે. કે લાઉડસ્પીકર વગાડી શકાશે નહીં.
નિયત ડેસિબલ કરતાં વધુ અવાજ રાખવા પર પ્રતિબંધ રહેશે.
કાયદેસરની કાર્યવાહીની ચેતવણી:
પોલીસ વિભાગ દ્વારા સ્પષ્ટ શબ્દોમાં ચેતવણી આપવામાં આવી છે કે, જો કોઈ પણ ડી.જે. માલિક કે ઓપરેટર આ નિયમોનું ઉલ્લંઘન કરશે, તો તેમની સામે કાયદેસરના કડક પગલાં લેવામાં આવશે અને સાધનો જપ્ત કરવા સુધીની કાર્યવાહી પણ થઈ શકે છે.
