પાટણ:
શહેરની સેવાભાવી સંસ્થા રોટરી ક્લબ ઓફ પાટણ અને ચિત્રકૂટ સોસાયટી યુવક મંડળના સંયુક્ત ઉપક્રમે એક મહા રક્તદાન કેમ્પનું આયોજન કરવામાં આવ્યું છે. આ કેમ્પ રાજ્ય કક્ષાના શ્રેષ્ઠ શિક્ષક પારિતોષિકથી સન્માનિત અને શેઠ એમ. એન. હાઈસ્કૂલ, પાટણના આચાર્ય રો. ડો. ધનરાજભાઈ ઠક્કરના જન્મદિવસની પ્રેરક ઉજવણીના ભાગરૂપે યોજાશે.
સેવા અને સમર્પણનો સંગમ
ડો. ધનરાજભાઈ ઠક્કર દર વર્ષે પોતાના જન્મદિવસની ઉજવણી અનોખી રીતે રક્તદાન કરીને કરે છે. આ વર્ષે પણ તેમની આ પરંપરાને વેગ આપવા માટે મોટી સંખ્યામાં રક્ત એકત્ર કરવાનો સંકલ્પ કરવામાં આવ્યો છે. આ પ્રસંગે આયોજકો દ્વારા તેમના ભૂતપૂર્વ વિદ્યાર્થીઓ અને સ્નેહીજનોને માનવતાના આ કાર્યમાં જોડાઈ રક્તદાન કરવા નમ્ર અપીલ કરવામાં આવી છે.
કાર્યક્રમની વિગત:
- તારીખ: ૩૧-૦૧-૨૦૨૬, શનિવાર
- સમય: બપોરે ૪:૦૦ થી ૭:૦૦ કલાકે
- સ્થળ: ચિત્રકૂટનગર સોસાયટી, રેલ્વેના બીજા ગરનાળા પાસે, યોગેશ્વર પાર્ક સોસાયટીની સામે, પાટણ.
- સહયોગી: એસ. કે. બ્લડ બેંક – પાટણ
વિશેષ આકર્ષણ
રક્તદાતાઓને પ્રોત્સાહિત કરવા માટે આયોજક મંડળ તરફથી દરેક ડોનરને આકર્ષક ગિફ્ટ આપી સન્માનિત કરવામાં આવશે.
આ કાર્યક્રમને સફળ બનાવવા માટે રોટરી ક્લબના પ્રમુખ રો. ડો. પરિમલ જાની, મંત્રી રો. જય દરજી, બ્લડ બેંક ચેરમેન રો. જયરામભાઈ પટેલ તેમજ ચિત્રકૂટ સોસાયટીના પ્રમુખ રમેશભાઈ પટેલ અને પ્રોજેક્ટ ચેરમેન રાજુભાઈ સોની (સરહદનો સાદ) સહિતની ટીમ ભારે જહેમત ઉઠાવી રહી છે. રક્તદાન કરવા ઈચ્છતા નાગરિકોને અગાઉથી નામ નોંધાવવા વિનંતી કરવામાં આવી છે.
