ચોથા માળે આગ લાગ્યાની પરિસ્થિતિનું સર્જન કરી બચાવ-રાહત કામગીરીનું પ્રદર્શન
ધારપુર મેડિકલ કોલેજ ખાતે આગ જેવી આપત્તિની પરિસ્થિતિમાં ત્વરિત બચાવ અને રાહત કામગીરી સુનિશ્ચિત થાય તે હેતુસર ડિઝાસ્ટર મામલતદાર કચેરી, પાટણ તથા એસડીઆરએફ, મડાણા ટીમ દ્વારા આગની મોકડ્રિલ યોજવામાં આવી હતી.
મોકડ્રિલ દરમિયાન ધારપુર મેડિકલ કોલેજના ચોથા માળે આગ લાગ્યાની પરિસ્થિતિનું નિર્માણ કરવામાં આવ્યું હતું. આગની ઘટનામાં ફસાયેલા વ્યક્તિઓને સુરક્ષિત રીતે બહાર કાઢવા માટે એસડીઆરએફ તથા ફાયર વિભાગની ટીમ દ્વારા બચાવ કામગીરી હાથ ધરવામાં આવી હતી. બચાવ બાદ અસરગ્રસ્ત વ્યક્તિઓને તાત્કાલિક પ્રાથમિક સારવાર આપવાની કામગીરીનું પણ પ્રદર્શન કરવામાં આવ્યું હતું.
આ મોકડ્રિલમાં ફાયર વિભાગ, આરોગ્ય વિભાગ, પોલીસ વિભાગ તથા ધારપુર મેડિકલ કોલેજના સ્ટાફે સહભાગી બની આગ જેવી કટોકટીની સ્થિતિમાં વિવિધ વિભાગો વચ્ચે સંકલન, ઝડપી પ્રતિસાદ અને બચાવ કામગીરીની પ્રક્રિયાનું પ્રાયોગિક નિદર્શન કર્યું હતું.
મોકડ્રિલનો મુખ્ય ઉદ્દેશ આગ જેવી આપત્તિ સમયે જાનમાલનું નુકસાન ઘટાડવા, બચાવ કામગીરીને વધુ સુદૃઢ બનાવવા તેમજ વિવિધ વિભાગોની તત્પરતા અને પરસ્પર સંકલન ચકાસવાનો રહ્યો હતો.
