પાટણ,
પાટણ શહેરમાં મિલકત સંબંધી ગુનાઓ અને ચોરીના બનાવો અટકાવવા તેમજ બનેલા ગુનાઓનો ત્વરિત ભેદ ઉકેલવા માટે બનાસકાંઠા રેન્જના આઈ.જી. પરિક્ષિતા રાઠોડ તથા પાટણ જિલ્લા પોલીસ વડા વી.કે. નાયી દ્વારા ખાસ સૂચનાઓ આપવામાં આવી હતી. આ સૂચનાઓ અન્વયે પાટણ વિભાગના નાયબ પોલીસ અધીક્ષક પરેશ રેણુકા અને પાટણ સિટી ‘એ’ ડિવિઝન પોલીસ સ્ટેશનના પોલીસ ઇન્સ્પેક્ટર કે.જે. ભોયેના સીધા માર્ગદર્શન હેઠળ સર્વેલન્સ સ્ટાફની ટીમ વિસ્તારમાં પેટ્રોલીંગમાં હતી.
બાતમીના આધારે વોચ ગોઠવી આરોપીઓને દબોચ્યા
પેટ્રોલીંગ દરમિયાન પોલીસ સ્ટાફના માણસો પાટણ ફાટીપાળ દરવાજા પાસે પહોંચતા, આસિસ્ટન્ટ હેડ કોન્સ્ટેબલ જિજ્ઞેશકુમાર દિનેશચંદ્ર અને આસિસ્ટન્ટ પોલીસ કોન્સ્ટેબલ દિવ્યાંગભાઇ ભરતભાઇને સંયુક્ત રીતે ખાનગી રાહે ચોક્કસ બાતમી મળી હતી કે, એક મોટરસાયકલ પર ત્રણ ઇસમો ચોરીનો મુદ્દામાલ વેચવા માટે ફરી રહ્યા છે. આ માહિતીના આધારે પોલીસે પાટણ બી.ડી. હાઇસ્કુલના પાછળના ભાગે વ્યૂહાત્મક વોચ ગોઠવી હતી. તે દરમિયાન એક સ્પ્લેન્ડર પ્લસ મોટરસાયકલ પર ત્રણ ઇસમો આવતા દેખાતા પોલીસે તેમને કોર્ડન કરી રોકી લીધા હતા.
તલાશી લેતા ચોરીનો ભેદ ઉકેલાયો
શંકાસ્પદ જણાતા ત્રણેય ઇસમોની અંગ ઝડતી લેતા તેમની પાસેથી એક પ્લાસ્ટિકની થેલી તેમજ ખિસ્સામાંથી રોકડ રકમ મળી આવી હતી. પોલીસ દ્વારા યુક્તિ-પ્રયુક્તિ પૂર્વક કડક પૂછપરછ કરવામાં આવતા, તેઓએ કબૂલાત કરી હતી કે ગત તારીખ ૩ જૂન ૨૦૨૬ના રોજ તેઓએ પાટણ ઘી-વટાના નાકે આવેલ ‘ભોગીલાલ પાન પાર્લર’ નામની બંધ દુકાનનું તાળું તોડી ચોરી કરી હતી, તેમજ નજીકના અન્ય એક મકાન અને પાનના ગલ્લાને પણ તોડવાનો પ્રયાસ કર્યો હતો. આ અંગે પાટણ સિટી ‘એ’ ડિવિઝન પોલીસ સ્ટેશનમાં ભારતીય ન્યાય સંહિતા (BNS) ની કલમ ૩૦૫(એ), ૩૩૧(૩), ૩૩૧(૪) અને ૬૨ મુજબ ગુનો નોંધી કાયદેસરની કાર્યવાહી હાથ ધરવામાં આવી છે.
રૂપિયા ૪૫,૯૫૦ નો મુદ્દામાલ રિકવર
પોલીસે ઝડપાયેલા આરોપીઓ પાસેથી ગુનામાં વપરાયેલ સાધનો અને ચોરીનો તમામ સામાન રિકવર કર્યો છે, જેમાં:
- રોકડા રૂપિયા ૭,૯૦૦/-
- પાન પાર્લરની દુકાનમાંથી ચોરેલો સર-સામાન (કિંમત રૂ. ૩,૦૫૦/-)
- ચોરીના ગુનામાં તેમજ હેરફેર માટે ઉપયોગમાં લેવાયેલ હીરો સ્પ્લેન્ડર પ્લસ મોટરસાયકલ (કિંમત રૂ. ૩૫,૦૦૦/-)
(કુલ મળીને પોલીસે રૂ. ૪૫,૯૫૦ નો મુદ્દામાલ જપ્ત કર્યો છે.)
ઝડપાયેલા રીઢા ગુનેગારોનો પ્રોફાઈલ અને ગુનાહિત ઇતિહાસ
પકડાયેલા ત્રણેય આરોપીઓ અગાઉ પણ અનેક ગુનાઓમાં સંડોવાયેલા હોવાનું સામે આવ્યું છે:
૧. મુકેશજી ગોવાજી ઠાકોર (રહે. ભાવસરીયા વાસ, રામજી મંદિરની બાજુમાં, તા. ચાણસ્મા, જિ. પાટણ): આ આરોપી અગાઉ ચાણસ્મા અને પાટણ સિટી ‘એ’ ડિવિઝન પોલીસ સ્ટેશનમાં અકસ્માત, ચોરી (BNS ૩૦૫), એમ.વી. એક્ટ કલમ ૧૮૫ (નશો કરીને વાહન ચલાવવું) અને અન્ય ગુનાહિત કલમો હેઠળ કુલ ૬ ગુનાઓમાં ઝડપાઈ ચૂક્યો છે.
૨. દિનેશજી સોમાજી મણાજી ઠાકોર (રહે. છાપરામાં, પદ્મનાભ ચોકડી, કેનાલ રોડ, પાટણ): આ આરોપી વિરુદ્ધ પાટણ સિટી ‘બી’ ડિવિઝન અને ‘એ’ ડિવિઝન પોલીસ સ્ટેશનમાં જી.પી. એક્ટ, ધાકધમકી (આઈપીસી ૫૦૪, ૫૦૬) તેમજ ઘરફોડ ચોરી (આઈપીસી ૪૫૭, ૪૫૪) જેવા ૪ ગંભીર ગુનાઓ નોંધાયેલા છે.
૩. મનોજભાઇ પ્રહલાદભાઇ રેવાભાઇ નાયી (રહે. ફ્લેટ નંબર ૦૨, કલાકુંજ ફ્લેટ, પ્રગતિ મેદાન પાસે, પાટણ): આ આરોપી અગાઉ પાટણ સિટી ‘બી’ ડિવિઝનમાં મારામારી (આઈપીસી ૩૨૩) ના ગુનામાં પકડાયેલ છે.
આ સફળ કામગીરી કરનાર પોલીસ ટીમ
આ સમગ્ર ગુનાનો ગણતરીના કલાકોમાં ભેદ ઉકેલવામાં પાટણ સિટી ‘એ’ ડિવિઝનના પી.આઈ. કે.જે. ભોયે, પીએસઆઈ એ.એમ. ચૌધરી, પીએસઆઈ કે.જે. કોડીયાતર, તેમજ સર્વેલન્સ સ્ટાફના હેડ કોન્સ્ટેબલ ધવલકુમાર ભગવાનભાઇ, પોલીસ કોન્સ્ટેબલ હેમરાજભાઇ અંબારામભાઇ, મહેન્દ્રભાઇ સેવંતીલાલ, કમલેશભાઇ ભાનુપ્રસાદ અને રમેશભાઇ અમરાભાઇએ પ્રશંસનીય કામગીરી બજાવી હતી.
